打定輸數

呢幾日keep住偷驗，綠d一路都係得個控，經驗話我知，唔會有奇蹟，所以我已經打定輸數，準備下一次放胎，第６次喇！

但係，下一個cycle o既排卵期，撞正我去旅行；再下一個cycle排卵期，Dr Tay就開始放大假。我之前問咗Dr，佢話可以打針谷排卵，咁即係話，我有機會可以o係去旅行前放多次雪胎。

問題係，我好唔好o係旅行前放胎呢？因為好有機會係出發前一兩日放，我仲要搭長途機，又要帶埋針藥去旅行，去到外地想薑水浸腳又唔容易，又唔可以燉花膠食，好似好唔方便。

我知大家可能會叫我試下去旅行時同老公試下自然，不過都難過中六合彩。如果下一個cycle唔放胎，就等旅行返o黎果個cycle放，應該又係要谷排卵先放到。

我仲有兩次放胎機會，好想趁Dr大假前拿拿林放埋佢算，如果７次放胎都唔成功，我都無話可說了。