沒偷驗的一次

常常說人生充滿希望，對我來說，我連希望都不敢去想。

我人生第９次放胎（2nd IVF的2nd FET）昨日結束，驗血結果為-ve，是意料之內，因為我一點懷孕感覺都沒有，女人的直覺許多時都很準的！

放了太多次胎了，我幾乎都已經忘了之前放胎的細節，今次最特別的是，我竟然沒有偷驗過！就算是放榜日當天，我也完全沒有意欲去驗，即使家裡尚有大量紅d和綠d，我還是等診所告訴我這次的結果。

醫生致電給我，建議我倆作一個blood test，去驗DNA和我的凝血指數，大約是，如果我們的基因有問題，很可能是慣性流產或不著床的原因，解決方法是抽取胚胎一兩個細胞去驗，要是有問題，那就直接放棄那個胚胎好了。另外就是凝向問題，如果是，那就吃aspirin和打薄血針。

前者DNA出錯機會很少，其實很罕見；後者我也試過在放胎期間食藥和打針，結果還不是不成功。

假設我倆沒有以上兩個問題，那就只能推斷是胚胎質素差，這就是之前那個醫生的說法。對於這個原因，我真的很無奈，因為似乎連醫生都束手無策，就算胚胎表面看來好好，也不代表他本身質素高，所以，我也只能一次又一次的放胎，一次又一次面對失敗。我常常想，兩次IVF我都抽了30粒蛋，有十幾粒授精，為什麼可以連一個好質素的胚胎也碰上？我的運去了哪？

想到IVF已用了我至少三十萬，我豈敢再抱任何希望呢？

一波三折

今次放胎，撞啱Dr Chan放假，因為一心想連續兩個月放，所以就算要另一位醫生頂替，我都照去。

放胎第二日，朝早起身時覺得小便有d唔妥，灼熱加刺痛，我都估到係尿道炎，打返診所同姑娘講，佢叫我即刻返去睇醫生。本來諗住放完胎休息兩日唔出街，同姑娘講可唔可以搵人去攞藥算，但姑娘唔肯，要我親自返去，由沙田去中環超遠，我唯有打的過去啦，出門時咁啱落大雨，等咗好耐先截到架的士肯車我過海。

醫生叫我食一個星期抗生素，同埋飲多d水同紅莓汁，我都好擔心咁樣會影響胚胎著床，但無計，唔食抗生素一陣攪到腎炎發燒仲衰！呢日咩心情都無哂，個心好唔安樂。

放胎第三日，在家休息，但下晝開始，我不停打乞嚏兼流鼻水，打乞嚏時，無可避免地會chok一chok個肚，夜晚瞓覺仲鼻塞添！

呢次放Day 5胚胎，頭2日就係著床日了，呢兩日最關鍵，所以我先請假休息，點知自己唔爭氣，尿道炎又傷風（第4日返工又無事喎~），一波三折，我都好灰，打定輸數喇！唔通連個天都唔鍾意我？

我諗過咗今次之後，我會休息下先再放，雖然我有咁多經驗，但每次都會好緊張，近期更加發現自己身體差咗好多，尿道炎／念珠菌排住隊搵我，醫生話我抵抗力唔夠，叫我食多d維他命C。講真，我除咗少運動之外，一向都注意飲食，呢幾個月仲keep住針灸同食中藥，似乎都對我幫助不大。