薄血針 + 類固醇

蝦佬，我終於旅行返o黎喇，返o黎又再即刻準備第6次放胎。好人好姐放咗5次胎都未成功，第6次對我o黎講已經太不可思議，之前仲一廂情願以為14個胚胎足夠畀我生3個b，原來係自己發夢！

去旅行時，我同我姑奶講開生仔o既嘢，佢之前結婚好幾年都未有細路，好明白我o既感受，特別係新年時，親戚朋友催你生仔會好大壓力，佢叫我唔好理人講乜，最緊要自己兩公婆開心，講講下，我竟然忍唔住喊咗出o黎。講真，我以為我自己已經放低咗過去唔開心o既事，我仲以為自己已經身經百戰到向人提起都唔會喊，但唔知原來被人安慰幾句就忍唔住了。

今次醫生又提到薄血針同類固醇，之前幾次都無用過呢兩種藥，我同老公覺得我哋曾經著床過，只係胚胎質素問題，所以無打算用呢d藥。但係醫生今次話為咗排除我自己本身可能存在o既抗體問題，去製造一個最適合胚胎o既環境，所以，好想我哋再考慮清楚係咪用藥。

坦白講，老公唔係好想用藥，特別係打針，因為如果bingo咗，就要打足3個月針，好難想像連續90日係咁打針o既精神壓力，佢唔想我受皮肉之苦。但我自己覺得打針o既痛我應該可以承受得住，反而我唔想食類固醇，好驚萬一(touch wood)有副作用，我個b好可能有兔唇，另外，我又好驚類固醇會令人口腫面腫，我覺得ivf後，我體重都重咗好多，果d黃體素藥令到我個人好肥，係人見到我都問我係咪有咗，但事實上當時我只係等bingo咋！

請問呢度有無blog友仔打過薄血針同食過類固醇o既經驗可以分享下？
當然，既然IVF都行到呢一步，無理由因為怕打針、怕肥而放棄一個解決方法，我點都會試下用藥，就算最終唔得都好，都叫努力過，係咪？不過，我諗我都係唔好向我哋o既父母提起呢d用藥喇，費事我媽戥我辛苦，會責怪我老公d身子唔好攪到我要攪咁多嘢；又或者佢哋知道副作用，可能會反對我用藥。

BTW，我今次又遲咗排卵，唔知點解之前未IVF前，一向都好準時排，但做咗IVF後，好多時放胎cycle佢都遲到，唔知今次醫生會唔會叫我唔好放住呢？唔放就要等幾個月後喇！